Turqia është gati të marrë pjesë në “forcën garantuese” që mund të vendoset në Ukrainë pas arritjes së një marrëveshjeje armëpushimi me Rusinë, me qëllim mbështetjen e ushtrisë ukrainase, njoftoi sot (27/11) Ministria turke e Mbrojtjes.
“Forcat e armatosura turke janë të gatshme të kontribuojnë në çdo iniciativë që synon garantimin e sigurisë dhe stabilitetit në rajonin tonë”, komentoi ministria në lidhje me pjesëmarrjen e mundshme të Turqisë në këtë forcë, krijimi i së cilës u propozua nga Presidenti francez Emmanuel Macron.
“Para së gjithash, duhet të ketë një armëpushim midis Rusisë dhe Ukrainës. Pastaj, duhet të vendoset një kornizë misioni, me një përcaktim të qartë të objektivave, si dhe kontributit të secilit vend”, shtoi Ministria Turke e Mbrojtjes.
Të martën (25/11), Macron deklaroi se do të krijohej një grup pune për “forcën garantuese”, qëllimi i së cilës do të ishte “forcimi i ushtrisë ukrainase” duke vepruar si një “vijë e dytë mbrojtjeje”, me kusht që Rusia dhe Ukraina të bien dakord për një armëpushim.
Forca do të drejtohet nga “Franca dhe Britania, në bashkëpunim të ngushtë me Turqinë , e cila luan një rol kyç në sektorin detar, dhe për herë të parë me përfshirjen e Shteteve të Bashkuara”, shtoi presidenti francez.
Turqia, e cila ka ushtrinë e dytë më të madhe në NATO për nga numri i ushtarëve, kishte lënë të kuptohet në mars se ishte gati të vendoste forca në Ukrainë “nëse është e nevojshme” për të siguruar paqen./kohajuaj.com
