Numri i të vdekurve nga përmbytjet e menjëhershme në Teksas, në jug të SHBA-së, është rritur në 50, njoftuan autoritetet të shtunën në mbrëmje (ora lokale), ndërsa kërkimet vazhdojnë për të gjetur shumë fëmijë që ende rezultojnë të zhdukur.
Përmbytjet, të shkaktuara nga shirat e rrëmbyeshëm që goditën pjesë të Teksasit qendror të premten, kanë vrarë 43 persona në Qarkun Kerr, më të prekurin, dhe shtatë të tjerë në tre qarqe të tjera, sipas një vlerësimi të AFP bazuar në shifrat zyrtare nga autoritetet lokale.
Ekipet e shpëtimit po kontrollojnë zonën duke kërkuar për persona të zhdukur, përfshirë 27 vajza që po ndiqnin një kamp veror në brigjet e lumit Guadalupe.
Dalton Rice, kreu i Këshillit të Qytetit të Kerrville, theksoi se nuk ishte në gjendje të përditësonte numrin e personave të zhdukur në këtë kohë. “Ne dimë për 27… Nuk do të publikojmë më shumë shifra sepse thjesht nuk i dimë”, u tha ai gazetarëve.
“Ne do të kërkojmë pa pushim për çdo viktimë të kësaj përmbytjeje. Nuk do të ndalemi as sot as nesër, do të ndalemi kur puna jonë të ketë mbaruar”, siguroi më parë Guvernatori i Teksasit Greg Abbott në një konferencë për shtyp, në prani të Sekretares së Sigurisë Kombëtare Kristi Noem.
Drejtori i Menaxhimit të Emergjencave në Teksas, Nim Kidd, tha se ekipet po kërkonin në lumin Guadalupe nga ajri, toka dhe uji për të mbijetuar ose të vdekur.
“Ne do të vazhdojmë kërkimin derisa të gjenden të gjithë personat e zhdukur”, theksoi ai.
Nga ana e tij, Guvernatori i Teksasit, Greg Abbott, e shpalli shtetin gjendje katastrofe natyrore dhe kërkoi burime shtesë nga qeveria federale e SHBA-së.
Dje në Kerrville, ujërat e lumit Guadalupe, i cili zakonisht është i qetë, po vërshonin me forcë, duke sjellë pemë dhe mbeturina në rrugën e tyre.
«Uji arriti lartësinë e pemëve, rreth 10 metra ose më shumë», tha Gerardo Martinez, një banor i zonës. «Lumi po rrëzon makina, shtëpi të tëra», shtoi ai.
Sekretarja e Sigurisë Kombëtare Kristi Noem siguroi se Presidenti Donald Trump dëshiron të “modernizojë teknologjitë” e disponueshme për shërbimet e parashikimit të motit dhe parandalimit të riskut, në një kohë kur administrata republikane po merr kritika të ashpra për uljen e ndjeshme të fondeve të saj dhe eliminimin e qindra vendeve të punës.
E pyetur në lidhje me ankesat e banorëve që thanë se nuk kishin marrë paralajmërim në kohë për rrezikun e përmbytjeve, Noem u përgjigj se “Do t’ia përcjell shqetësimet e tyre qeverisë federale”.
Sipas Dalton Rice, një zyrtar lokal në Kerrville, në disa zona uji arriti “nivelin e përmbytjeve që kemi parë në 100 vjet”. “Parashikimet ishin padyshim të gabuara”, shtoi ai, dhe sasia e shiut “ishte dyfishi i asaj që pritej”.
Në zonën e Kampit Mystic, uji ishte tërhequr kryesisht dje, duke zbuluar dëmet e mëdha, me makina të përmbysura ose të rrëmbyera nga ujërat dhe disa të ngulitura në pemë.
Dhomat ku ishin vendosur vajzat janë shkatërruar, dyshemeja është e mbuluar me baltë dhe dritaret janë thyer nga vërshimi i ujit.
Rreth 500 shpëtimtarë, të ndihmuar nga 14 helikopterë, janë mobilizuar për të kërkuar të mbijetuar dhe viktima, ndërsa Garda Kombëtare e Teksasit dhe Roja Bregdetare kanë dërguar përforcime.
Sipas autoriteteve, lumi Guadalupe u rrit me gati 8 metra të premten në rreth 45 minuta, gjatë të cilave “ranë gati 300 milimetra shi në orë”, një e treta e reshjeve mesatare vjetore të reshjeve në qark.
Rreth 850 persona u evakuuan me nxitim.
Përmbytjet e menjëhershme, të shkaktuara nga shirat e rrëmbyeshëm që toka e tharë nga thatësira nuk mund t’i thithë, nuk janë të rralla. Megjithatë, sipas komunitetit shkencor, ndryshimet klimatike të shkaktuara nga njeriu i kanë bërë ngjarjet e motit – të tilla si përmbytjet, thatësirat dhe valët e të nxehtit – më të shpeshta dhe intensive.
Në mesin e qershorit, 13 persona vdiqën për shkak të përmbytjeve në San Antonio, pranë zonës së goditur të premten nga shirat e rrëmbyeshëm./ kohajuaj
