Rreth 2,000 trupa të Koresë së Veriut janë nisur për në rajonin e Kurskut të Rusisë dhe një numër i vogël tashmë janë atje, tha sot një zëdhënës i Departamentit të Mbrojtjes të SHBA, duke shtuar se ka indikacione se Moska synon t’i përdorë ato kundër trupave ukrainase.
Zëdhënësi i Pentagonit, Patrick Ryder shprehu shqetësimin për qëllimin e dyshuar të Rusisë për të përdorur ushtarët e Koresë së Veriut “në luftime ose për të mbështetur operacionet e saj kundër forcave ukrainase në Kursk”. Duke iu përgjigjur pyetjeve të gazetarëve, ai theksoi se nuk është në gjendje të konfirmojë raportet se trupat e Koresë së Veriut janë vendosur në territorin e Ukrainës.
“Ne vazhdojmë të monitorojmë zhvillimet dhe të konsultohemi me partnerët tanë ukrainas, si dhe me aleatët dhe partnerët e tjerë”, tha Ryder.
Gushtin e kaluar, forcat ukrainase filluan një pushtim të befasishëm në rajonin rus të Kurskut dhe pushtuan një pjesë të konsiderueshme të tij.
