Autoritetet rumune kanë vendosur të mbyllin qindra shkolla në kryeqytet, si dhe në jug dhe juglindje të vendit, të mërkurën (8/10), pasi ato janë vënë në alarm të kuq për shkak të një episodi shumë të rrëmbyeshëm reshjesh që priten nga nata e vonë e së martës (7/10).
“Priten reshje që mund të arrijnë 80-100 litra për metër katror dhe në zona të izoluara sasia e ujit mund të arrijë 120-140 l/m²”, tha sot Ministria e Mjedisit, duke rekomanduar që qytetarët të shmangin udhëtimet gjatë gjithë periudhës së alarmit.
“Prioriteti ynë është t’i sigurojmë banorët, t’u themi atyre se nuk janë në rrezik, të sigurohemi që Bukureshti të mos ngecë dhe se nuk ka nxitim për të shkuar dhe për të marrë fëmijët nga shkolla dhe për t’i sjellë në shtëpi”, u tha gazetarëve këtë pasdite kryebashkiakut të përkohshëm Stelian Bujduveanu.
Rumania u përball me përmbytje gjatë verës, të cilat morën jetën e tre personave në pjesën verilindore të vendit.
Presidenti, Nikusor Dan, tha në atë kohë se këto “ngjarje dramatike” tregojnë rëndësinë e “investimeve të qëndrueshme në parandalimin dhe mbrojtjen nga rreziqet klimatike”.
Sipas ekspertëve, reshjet e shiut kanë tendencë të bëhen më intensive për shkak të ngrohjes globale.
Javën e kaluar, katër persona vdiqën në Bullgarinë fqinje pasi shirat e rrëmbyeshëm goditën bregdetin e Detit të Zi./kohajuaj
