Në Asamblenë Kombëtare të Partisë Socialiste, Kryeministri Edi Rama u ndal në çështjet e drejtësisë, duke folur me kritika ndaj gjyqtarëve dhe prokurorëve që sipas tij, “mbajnë në radhët e veta sy të ngushtë dhe mungesë integriteti”.

– “Nuk e kemi bërë dhe nuk do ta bëjmë asnjëherë avokatin e kujtdo që hetohet apo ndalohet nga drejtësia, qoftë kjo e drejtë apo jo. Nuk do të kemi asnjë pendesë për lirinë dhe pavarësinë që i kemi dhënë drejtësisë me Reformën në Drejtësi dhe me tërheqjen historike të pushtetit të shumicës nga fusha e pushtetit gjyqësor.”-tha Rama.

Më tej Rama vijoi:

“Një pushtet gjyqësor që i qeveris vetë punët e veta, jashtë vullnetit të partive, është një ndryshim epokal në historinë e këtij vendi. Kush flet për kontroll nga ana jonë me urdhra nga lart, ose nuk di çfarë flet, ose nuk do të pranojë të vërtetën shumë të madhe të këtij ndryshimi.”

Nga ana tjetër Rama tha se është krenar për reformën në drejtësi.

“Forca jonë e madhe i ka hapur një shteg drejtësie dhe unë jam krenar për këtë. Por ato sëmundje që godasin rrugët e frymëmarrjes së lirisë njerëzore, si pushteti i drejtësisë që mban në radhët e veta prokurorë dhe gjyqtarë me sy të ngushtë dhe mungesë integriteti, janë kërcënim real. Rasti i kohëve të fundit ku janë përplasur interesat publike është emblemë e problemeve që ende duhet të përballojmë.”-tha Rama