Eliminimi i Ardian Nikulajt, i cili u vra nga të huaj më 19 prill brenda lokalit të tij në Shëngjin, është projektuar prej të paktën 2 vitesh. Porositësit kërkuan gjithandej për pajtimin e një vrasësi brenda vendit, por burime konfidenciale i thanë Report Tv se askush nuk e mori përsipër vrasjen e 51-vjeçarit.

Të njëjtat burime, referuar raporteve të agjencive inteligjente, saktësojnë se për vrasjen e tij ishin ofruar deri në 500 mijë euro, por sërish nga vrasësit shqiptarë me pagesë është konsideruar pre shumë e vështirë.Kjo, mesa duket, ka detyruar Edmond Haxhinë, që të pajtojë një skuadër të tërë vrasësish dhe bashkëpunëtorësh nga Britania e Madhe dhe Portugalia për t’i dhënë fund misionit. Vetë Ardian Nikulaj e kishte nuhatur se e donin të vdekur prej të paktën 6 muajsh, dhe për këtë arsye kishte rritur sigurinë dhe lëvizjen me makinë të blinduar, por pa ditur se kush ishin agresorët.

Për të vrarë 51-vjeçarin, Edmond Haxhia, solli në Tiranë 4 britanikët, Thomas Mithan, Steven Hunt, Harriet Bridgeman, Harry Simpson si bashkëpunëtorë e informatorë dhe portugezin Ruben Saravia, si ekzekutorë. Të huajt mbërritën në Shqipëri njëri pas tjetrit, kamufluar si turistë, por që në fakt mision kishin vrasjen. Saravia e vëzhgoi për 2 muaj terrenin ku do të vriste biznesmenin dhe politikanin lokal të Lezhës, teksa bazën e qëndrimit e kishte tek shtëpia e Haxhisë në fshatin Kakarriq.

Pas disa ditësh intensive vëzhgime, më në fund, agresori qëlloi drejt Nikulajt mesditën e 19 prillit, pasi u njoftua nga bashkëpunëtorët. Po atë ditë, britanikët dhe portugezi lanë vendin tonë, një pjesë nga Rinasi dhe pjesa tjetër nga pika kufitare e Kapshticës në rrugë tokësore, ndërsa një ditë më vonë fluturoi drejt Londrës Edmond Haxhia. Por, liria e 4 prej 6 personave të shpallur në kërkim zgjati pak, pasi policia dhe prokuroria siguruan prova të mjaftueshme shkencore dhe pamje filmike për t’i identifikuar.

Haxhia, Mithan, Hunt dhe Bridgeman, u arrestuan të shtunën në Londër, pasi u lokalizuan nga autoritetet shqiptare përmes komunikimeve të celularëve. Të arrestuarit pritet të ekstradohen drejt Tiranës pas përfundimit të procedurave, ndërsa për shkak të veprës penale që akuzohen, mendohet se gjykatat britanike nuk do të pengojnë ardhjen e tyre për t’u hetuar e gjykuar në Shqipëri.

Dy të tjerët, Ruben Saravia dhe Harry Simpson, akoma nuk janë lokalizuar. Arrestimi i Saravias në vendin e origjinës Portugali dhe më pas ekstradimi i tij në vendin tonë do të ishte i vështirë, por përmes Britanisë së Madhe ekziston një mundësi. Duke qenë se në vendin ishullor kërkohet për trafik droge, ekstradimi të bëhet fillimisht atje dhe më pas drejt Tiranës./ Shqiptarja.com