Numri i të vdekurve nga përmbytjet shkatërruese që goditën Spanjën lindore është rritur në 158. Kjo është një rritje dramatike pasi ekuipazhet e shpëtimit garojnë me kohën për të kërkuar të mbijetuar në tonelatat e baltës që kanë mbuluar zona të gjera.
Siç raportojnë mediat spanjolle, 155 të vdekur janë gjetur në Valencia, dy në Castile dhe një në Andaluzi.
Agjencia shtetërore e lajmeve EFE, ka transmetuar rekordin e ri zyrtar të numrit të viktimave, pa hyrë në detaje. Raporti i mëparshëm i autoriteteve, dje më 30 tetor, fliste për 95 të vdekur.
Përmbytjet më vdekjeprurëse në historinë moderne të Spanjës kanë përfshirë rajonin lindor të Valencias, pasi shirat e rrëmbyeshëm goditën rajonin të martën dhe të mërkurën, duke zhytur rrugë dhe qytete në ujë me baltë.
Imazhet satelitore të publikuara nga Agjencia Evropiane e Hapësirës (ESA) tregojnë shtrirjen e efekteve të reshjeve të dendura dhe përmbytjeve të shpejta në rajonin e Valencias të Spanjës. Imazhet, të marra nga sateliti amerikan Landsat-8, “përshkruajnë gjallërisht shkallën e katastrofës”, thotë ESA, dhe “transformimin dramatik të peizazhit”.
Fotot satelitore të ESA: Fotoja e parë është bërë më 8/10, ndërsa e dyta dje 30/10
Ekipet e shpëtimit, së bashku me banorët dhe ushtrinë po punojnë gjatë gjithë kohës në një përpjekje për të hequr tonelatat e baltës dhe për të gjetur të mbijetuar. Nuk ka asnjë numër të konfirmuar të të zhdukurve për momentin. Ministri i Transportit i Spanjës tha se trupat e njerëzve ka të ngjarë të jenë të bllokuar edhe në automjetet e tyre.
