Të paktën 36 persona kanë vdekur pasi një varkë u përmbys në Nigerinë veriperëndimore, thanë shërbimet e urgjencës për AFP sot, duke rritur frikën se numri i të vdekurve mund të kalojë 100.

Varka u mbyt të martën në lumin Niger. Gati 150 nga rreth 300 personat në bord u shpëtuan, por “nuk ka asnjë shans” për të gjetur të mbijetuar të tjerë, tha zëdhënësi i shërbimeve të urgjencës, Ibrahim Husseini.

Sipas tij, varka mbante shumë gra dhe fëmijë që po shkonin në komunitetin Gbajibo për festën myslimane të Mevlidit, që përkujton lindjen e profetit Muhamed.

Raporti i djeshëm fliste për të paktën 16 të vdekur. “Sot gjetëm edhe 20 trupa të tjerë, duke e çuar në 36 numrin e të vdekurve të nxjerrë nga ujërat e lumit”, tha Husseini. “Nuk ka asnjë shans për të gjetur më të mbijetuar. Të gjithë të zhdukurit janë të vdekur”, theksoi ai me siguri.

Muajin e kaluar, një varkë e mbingarkuar u mbyt në një lumë në shtetin Zamfara (në veriperëndim), duke vrarë më shumë se 40 njerëz./koha juaj