Grupi Meta (Facebook, Instagram) ka vendosur të eliminojë rreth 600 pozicione në departamentin e tij të dedikuar për inteligjencën artificiale (IA), si pjesë e racionalizimit të operacioneve të tij, pas një sërë punësimesh, raportuan mediat amerikane dje, të mërkurën.
Vendimi i menaxhmentit të Metës synon, sipas një raporti në New York Times, të zvogëlojë “fryrjen organizative”, pas një fushate punësimi për të forcuar aftësitë e saj në inteligjencën artificiale.
Sipas raportit të Wall Street Journal, shumicës së punonjësve të prekur nga shkurtimet e vendeve të punës do t’u ofrohet mundësia për të ndryshuar departamente.
Të dyja gazetat cituan një memo të brendshme nga drejtori i përgjithshëm i inteligjencës artificiale të grupit, Alexander Wang, sipas të cilit këto eliminime do të siguronin që “të kërkohen më pak diskutime për vendimmarrje”.
Meta nuk u përgjigj menjëherë kur AFP e pyeti për koment.
Grupi i Mark Zuckerberg po bën investime të mëdha në inteligjencën artificiale, ndërsa sipërmarrësi dëshiron të fitojë terren ndaj rivalëve të tij në garën për “superinteligjencë”, teknologji hipotetike me aftësi njohëse superiore se ato të njerëzve, “Graali i shenjtë” i Silicon Valley.
Në mesin e shtatorit, Meta prezantoi syzet e lidhura, të cilat përfshijnë një ekran të integruar dhe aftësi të gjera të inteligjencës artificiale, duke vazhduar bastin e saj për bashkimin e botës reale me atë “virtuale” (dixhitale).
Grupi njoftoi në gusht se po krijonte një organizatë në Kaliforni për të financuar kandidatët vendas që favorizojnë rregullore më pak të rrepta të inteligjencës artificiale, duke përmendur konkurrencën nga Kina./kohajuaj
Burimi: Wall Street Journal , New York Times
