Shefi i shtabit të ushtrisë izraelite ka të drejtë të “shprehë” mendimin e tij mbi fazën tjetër të luftës në Rripin e Gazës, por duhet të “zbatojë me vendosmëri” vendimet politike të qeverisë, tha sot Ministri i Mbrojtjes, Israel Katz.
Ndërsa kryeministri Benjamin Netanyahu po përgatitet të njoftojë një fazë të re operacionesh në enklavën palestineze kundër Hamasit dhe me qëllim lirimin e pengjeve, shtypi izraelit po raporton rezerva, madje kundërshtime, nga Shefi i Shtabit të Përgjithshëm, Eyal Zamir.
“Është e drejtë dhe detyrë e Shefit të Shtabit të Përgjithshëm të shprehë qëndrimin e tij para institucioneve kompetente”, komentoi ministri në X. “Por pasi të merren vendimet në nivel politik, ushtria do t’i ekzekutojë ato me vendosmëri dhe profesionalizëm… derisa të arrihen qëllimet e luftës”, theksoi Katz.
“Si Ministër i Mbrojtjes, përgjegjës për ushtrinë në emër të qeverisë, duhet të sigurohem që këto plane të zbatohen”, shtoi ai.
“Refuzimi i Hamasit për të liruar pengjet kërkon që të merren vendime shtesë në një mënyrë që do të çojë përpara qëllimet e luftës: shkatërrimin e Hamasit duke krijuar kushtet për lirimin e pengjeve dhe garantimin e sigurisë së komuniteteve izraelite tani e përgjithmonë”, përsëriti Katz./kohajuaj
