Kryeministrja italiane Giorgia Meloni u takua sot në Romë me kryeministrin britanik Keir Starmer. Tema kryesore e diskutimit mes dy kryeministrave ishte imigracioni, me forcimin e bashkëpunimit mes dy vendeve.

“Problemi i emigracionit të parregullt ka të bëjë me të gjithë Europën, mendoj se mund të bashkëpunojmë për sa i përket luftës kundër trafikantëve, të dhënave dhe rezultateve të arritura nga Italia, me një ulje të mbërritjeve nga deti, në masën 50%”, nënvizoi. kryeministri britanik. Ai shtoi se “parandalimi është i një rëndësie kyçe, e cila arrihet edhe falë bashkëpunimit me vendet e ndryshme të origjinës”.

Georgia Meloni, duke iu referuar të njëjtës çështje, tha:

“Ky është një bashkëpunim në një rreze prej treqind e gjashtëdhjetë gradësh që ka të bëjë kryesisht me policinë dhe shërbimet e sigurisë të vendeve tona. Në të ardhmen, megjithatë, ne do të dëshironim gjithashtu të harmonizojmë më tej kuadrin tonë ligjor”.

“Besoj se ky bashkëpunim ka të bëjë edhe me Interpolin dhe Europolin, të cilët duhet të marrin sektorë të veçantë për këtë qëllim specifik. Mbretëria e Bashkuar është gjithashtu e interesuar për bashkëpunimin që kemi zhvilluar me vendet afrikane, duke iu referuar edhe riatdhesimeve vullnetare, të subvencionuara”, shtoi kryeministri italian.

“Është hera e parë që krijohen qendra të tilla për shqyrtimin e kërkesave për azil. Nëse ato sjellin rezultate, siç mendoj unë, do të jetë gjithashtu një zgjidhje e re në drejtim të dekurajimit të trafikantëve. Do të duhen edhe disa javë për të vënë në funksion këto qendra, por unë nuk e shoh këtë si problem”.

Kreu i qeverisë italiane mohoi se në këto qendra mund të ketë shkelje të të drejtave të njeriut pasi siç tha ajo, brenda tyre do të zbatohet legjislacioni italian dhe ai europian.

“Biseduam për planin e bashkëpunimit me Shqipërinë, i cili ende nuk është zbatuar. Megjithatë, ajo është pjesë e strategjisë më të gjerë të parandalimit. Nga ana jonë mund të them se i jemi rikthyer pragmatizmit të njohur, britanik”, përfundoi Keir Starmer.

Dy kryeministrat konfirmuan mbështetjen e Ukrainës për një paqe të drejtë dhe nevojën për të intensifikuar përpjekjet për lirimin e pengjeve izraelite dhe forcimin e ndihmës humanitare për popullsinë civile në Gaza. Në fund, Georgia Meloni dhe Keir Starmer nënvizuan se dy vendet e tyre synojnë t’i japin shtysë të mëtejshme bashkëpunimit të tyre ekonomik.