Gjykata e Elbasanit ka vendosur që të mos ekstradohet në Rusi Svetlana Timofeva, e cila akuzohet për spiunazh. Ishte prokuroria ajo që kërkoi mospranimin e kërkesës së ekstradimit nga shteti rus me arsyet se në vendin e saj nuk do t’i sigurohen të drejtat ligjore sipas konventës së të drejtave të njeriut, teksa në Shqipëri ka një proces penal në ngarkim të saj.
Në të njëjtën linjë ishte dhe qëndrimi i avokatit mbrojtës Fatmir Lushi. Në fund, gjykata pranoi kërkesën e prokurorisë për të mos ekstraduar blogurën ruse.
Svetlana Timofeeva u arrestua më 20 gusht të vitit 2022 me bashkëkombësin e saj Mikhail Zorin dhe ukrainasin Fedir Alpatov pranë ish-uzinës së armëve në Gramsh teksa kur i pikasën nga dy ushtarakë i sulmuan me spraj kimik. Në Shqipëri, të tre të huajt akuzohen për “Goditje për shkak të detyrës”, “Dhënie e informatave sekrete”, dhe “Sigurimi i informatave”, kryer në bashkëpunim.
Rusia kërkon ekstradimin e 33-vjeçares pasi atje është e akuzuar për “Marrje e paligjshme e informacionit që përbën sekret shtetëror”, por 33-vjeçarja kërkon azil politik duke thënë se ka dalë hapur kundër presidentit rus Vladimir Putin dhe për këtë arsye mund t’i rrezikohet jeta.
