Mijëra protestues kanë dalë në rrugë në të gjithë Francën për të “bllokuar gjithçka”, sipas thirrjeve të bëra në mediat sociale. “Menuja” e sotme përfshin bllokime rrugësh, dhjetëra arrestime, ndjekje jashtë shkollave dhe ndërhyrje policore.
10 shtatori agoi në pritje të qeverisë së re në Francë, pas emërimit të Sébastien Lecorni nga Emmanuel Macron në mbrëmjen e së martës, më 9 shtator, por francezët e kishin bërë tashmë takimin e tyre të madh në rrugë.
Ministri aktual i Mbrojtjes do të pasojë François Bayrou, i cili dha dorëheqjen pas rënies së qeverisë së tij pasi nuk arriti të merrte një votëbesim nga parlamenti.
Që nga mëngjesi i hershëm i së mërkurës, protestuesit kanë vërshuar në një numër qytetesh franceze si pjesë e thirrjeve “Blloko gjithçka” që janë përhapur gjerësisht në mediat sociale dhe u bëjnë thirrje njerëzve të dalin në rrugë dhe të reagojnë ndaj masave të ashpra shtrënguese të propozuara nga kryeministri në largim, François Bayrou, për të adresuar krizën fiskale që ka prekur Francën.
Sipas autoriteteve, demonstruesit zhvilluan protesta në autostrada, duke shkaktuar probleme me trafikun, ndërsa dhjetëra njerëz u arrestuan ndërsa forcat e sigurisë u vendosën në të gjithë vendin.
Konkretisht, rreth pesëdhjetë arrestime u kryen në rajonin e Parisit, sipas policisë, kryesisht pas bllokadave ose përpjekjeve për të bllokuar Perpignanin.
Shumë shkolla të mesme në Paris u bllokuan nga nxënësit të mërkurën në mëngjes.
Policia përdori forcë jashtë shkollave në Paris.
Fermerët gjithashtu dolën në rrugë me traktorët e tyre për të marrë pjesë në protesta.
Rreth 6,000 oficerë policie janë vendosur në kryeqytet, ku gazetarët e AFP-së kanë qenë dëshmitarë të veprimeve të ndryshme. Në agim, për shembull, rreth njëqind të rinj bllokuan një stacion autobusi në veri të Parisit përpara se të ndërhynte policia e trazirave.
Policia madje ndoqi njerëz të dyshuar për pjesëmarrje në protesta në kafenetë e Parisit.
Në Paris, trafiku është “pothuajse i qetë” në rrjetet e metrosë dhe autobusëve, ndërsa ka probleme në linjën RER B, me dy nga tre trena që qarkullojnë në të. Linja RER B përshkon rajonin e Parisit nga veriu në jug, duke kaluar nëpër qendrën e kryeqytetit dhe duke i shërbyer aeroportit Charles de Gaulle të Parisit.
Përleshjet shpërthyen në një autostradë në Rennes, ku një autobus shpërtheu në flakë.
Aksionet e para u zhvilluan edhe në Francën lindore, me protestues që i vunë flakën objekteve në një urë pranë Caen (Francë verilindore).
Sipas mediave lokale, dhjetëra protestues u mblodhën në një autostradë në Lyon për të tentuar të bllokonin një nga daljet e unazës veriore, duke organizuar barrikada në rrethrrotullim.
Në shumë qytete në Francën perëndimore, përpjekjet e para për bllokada ndodhën në kryqëzime të ngarkuara, veçanërisht në Nantë.
Gjithashtu në Tuluzë (jugperëndim) rreth 200 protestues bllokuan një kryqëzim për më pak se një orë me ndihmën e gardheve dhe gomave.
Qeveria njoftoi se forcat e sigurisë do të vendosen nga mbrëmja e së martës “në zona të ndjeshme” dhe njoftoi se do të ketë “tolerancë zero”, ndërsa afërsisht “80,000 xhandarë dhe oficerë policie” janë mobilizuar në të gjithë Francën.
Disa shohin në këtë mobilizim, të nxitur nga shkurtimet fiskale që qeveria e dorëhequr kishte dashur të impononte, rikthimin e mundshëm të një vale zemërimi të ngjashme me atë të “jelekëve të verdhë” që tronditën vendin në vitet 2018 dhe 2019.
Informacioni rreth protestave të së mërkurës “Blloko gjithçka” qarkulloi në mediat sociale gjatë verës, dhe demonstratat u krahasuan me protestat e “Jelekëverdhëve” të vitit 2018, të cilat filluan si reagim ndaj rritjes së çmimeve të karburantit, por evoluan në një lëvizje më të gjerë kundër Presidentit Francez Emmanuel Macron dhe planeve të tij për reforma ekonomike./kohajuaj
