Tym i bardhë apo serish tym i zi? Kjo është ajo që prej më shumë se dhjetë orësh pritet të dalë nga oxhaku i vilës së Ohrit, aty ky kryeministri i Kosovës Albin Kurti dhe presidenti serb, Aleksandër Vuçiç janë duke negociuar për planin franko-gjerman. Gjer tani takime, biseda, negociata dhe ende nuk ka asnjë njoftim se çfarë po ndodh në tryezën e bisedimeve.
Kurti, që një ditë më parë mbërriti në Ohër, mëngjes e sotëm nisi takimet me zyrtaret e BE. Rreth orës 10.0 ai u takua me shefin e diplomacisë në BE, Josep Borrel, teksa më pas vijuan takimet me Gabriel Escobar dhe Miroslav Lajçak. Rreth orës 15.00 nisi takimi mes Albin Kurtit dhe Aleksadër Vuçiç.
Pas rreth një orë pati një ndërprerje dhe u duk sikur u mbylla aty, por rinisën negociatat dhe prej 4 orësh nga ajo ndërprerje biseda vijon. Pra janë në total rreth10 orë takime e negociata në Ohër me shpresën se do të gjendet gjuha e përbashkët për arritjen e paqes. SHBA e BE e kanë bërë të qartë se sot kërkojnë të firmoset plani franko-gjerman. Sikundër thuhet, kush refuzon do të përballet me pasoja dhe si Kurti ashtu dhe Vuçiç nuk janë në pozita të lehta.
Plani franko-gjerman shihet si hapi i parë drejt normalizimit të marrëdhënieve. Kurti ka deklaruar se sot ka shkuar në Ohër të firmosë marrëveshjen, ndërkohë vetë Vuçiç një natë më parë deklaroi disa herë se nuk ka për të firmosur. Për të vija e kuqe është asociacioni. Vetë Kurti nuk e pranon asociacionin dhe kjo ndan palët. Mbetet të shihet nëse sot do të ketë apo jo rezultat pozitiv.
