E ëma e Eleonora Toçit, e cila u mbyt nga bashkëshorti i saj Lulzim Toçi në krevat në banesën e tyre në Itali, ka rrëfyer si mori vesh lajmin tragjik.

Në News 24, Natasha Gjura ka rrëfyer se kanë qenë familjarët që i kanë treguar se “vajzën ua ka vrarë burri”, duke shtuar se kishin folur me vajzën disa orë para krimit të rëndë.

“Kemi dhimbje të madhe, shkoi në Itali për një jetë më të mirë, këtu nuk kishte kushte. E morëm vesh kur erdhën njerëzit dhe na treguan ‘vajzën ua ka vrarë burri’. Ma ka treguar vëllai im dhe vëllezërit e burrit.

Na e treguan njerëzit e burrit. Nuk e kisha ndezur televizorin, se kisha punë. Edhe burri ishte në punë. Në darkë u ulëm të shikonim lajmet, burri i vajzës së madhe na tha ‘të shikojmë filma’, ai e dinte. Mbrëmjen e krimit kemi folur me vajzën, s;na tha që kishte probleme. Kemi folur me datën 3 tetor, po bënte darkën, kur erdhi burri e mbyllëm telefonin”, tha ajo.

Ajo rrëfeu se Lulzim Toçi e kishte braktisur vajzën e saj në rrugë së bashku me dy fëmijët e mitur gjatë kohës që jetonin në Dibër.

Nëna e viktimës rrefeu se pas ndarjes, ai e akuzoi Eleonorën se e kishte helmuar, por analizat, sipas saj treguan se nuk ishte e vërtetë.

Ajo u shpreh se pas akuzave çifti u divorcuan, por 6 muaj pas ndarjes Lulzim kërkoi të rikthehej sërish me Eleonorën, duke u ribashkuar.

“Nuk ka pasur probleme të shëndetit mendor, vajzën kur e solli këtu shtëpia, e ka lënë në rrugë të madhe. Me 9 Janar e solli, kurse me 10 janar erdhi policia këtu tek shtëpia dhe kishte akuzuar Eleonorën se e kishte helmuar. Dhëndri ma kishte lënë vajzën në rrugë së bashku me dy fëmijët, dhe vetë kishte ikur tek i ati. Ai ishte dërguar në spital dhe analizat treguan se nuk ishte helmuar. Ndërkohë vajza ishte tek shtëpia jonë.

Pas kësaj thanë ‘nuk pranojmë që vajza të vijë më tek ne’ dhe u divorcuan. Vjehrrit nuk donin që ata të bashkoheshin, djali i tyre pyeste nënën e babën, nuk ishte i vendosur, Divorcin e hapi vetë ai, jo ne. Pas divorcit e kërkoi sërish vajzën, pas 6 muajsh. Lulëzimi e kërkoi, me prindërit nuk kemi folur”, tha ajo.

“Fëmijët nuk kemi kushte ti rrisim, më mirë të rrinë në Itali. Djali im është në kamp në Milano, nuk e lejojnë t’i shkojë. Fëmijët nuk kam kushte ti mbaj”, përfundoi ajo.