Një gjykatë daneze paditi dy adoleshentë suedezë sot, të enjten, 3 tetor, për posedimin e pesë granata dore dhe shpërthimin e dy prej tyre në një çati pranë ambasadës suedeze në Kopenhagë , tha prokurori para gjykatës.
Askush nuk u lëndua në dy shpërthimet që ndodhën herët në mëngjesin e së mërkurës, por ndërtesa pranë ambasadës pësoi disa dëme, sipas hetuesve.
Dy adoleshentët, 16 dhe 19 vjeç, u arrestuan të mërkurën në një tren në stacionin kryesor hekurudhor të Kopenhagës dhe u morën në pyetje sot në një gjykatë të Kopenhagës. Gjykata ndaloi publikimin e emrave të tyre.
Një burrë i tretë, 19 vjeç, u dërgua diku tjetër në kryeqytetin danez dhe u lirua pas marrjes në pyetje, tha policia daneze.
Policia tha se po hetonte nëse ambasada ishte objektivi i shpërthimeve.
Shpërthimet në Kopenhagë pasuan përshkallëzimin e tensioneve në Lindjen e Mesme.
Izraeli, i cili ka luftuar Hamasin në Rripin e Gazës për gati një vit, dërgoi trupa në Libanin jugor pas disa muajsh përleshjesh ndërkufitare me lëvizjen Hezbollah të mbështetur nga Irani. Irani lëshoi një breshëri raketash drejt Izraelit të martën.
Të paktën dhjetë suedezë janë akuzuar për tentativë vrasjeje ose posedim të armëve në Danimarkë këtë vit, duke çuar në kritika për përhapjen e krimit të organizuar.
Autoritetet suedeze kanë thënë në të kaluarën se forcat e sigurisë kanë penguar disa sulme të planifikuara të lidhura me shërbimet iraniane të sigurisë duke përdorur rrjete kriminale lokale, një akuzë që Irani e ka quajtur “të pabazë”./kohajuaj
