“Restaurojmë trashëgimin kulturore të Shqipërisë për të ardhmen”, është diçitura e vendosur në ballë të godinës së Muzeut Historik Kombëtar, në maj të vitit 2021, pra rreth dy vite më parë, dhe që ende qendron e s’dihet sa do të qendrojë në po të njejtin vend pasi dihet veç data e fillimit të punimeve restauruese kurse jo ajo e përfundimit të këtij procesi. Kjo pasi ndërsa lajmërohet si fillim punimesh (shih foton më poshtë) muaji maj 2021, një dorë e paidentifikuar ka prishur atë të përfundimit të restaurimit.
Në ndjekje të këtij triplimi “Koha Juaj” iu drejtua drejtorit të Muzeut, Dorian Koçi, i cili konfirmoi se institucioni që ai drejton është jashtë këtij procesi, ku të përfshirë drejtëpërdrejtë janë përkatësisht: Ministria e Kulturës në rolin e partnerit, UNOPS në rolin e implementuesit (zhvilluesit). Instituti Kombëtar i Trashëgimisë Kulturore rezulton të jetë mbikqyrës i punimeve (supervizor). Ajo që bën përshtypje e bie në sy është fakti se ndërsa po mbushen rreth dy vite, nga vendosja e tabelës dhe nisja e punimeve, vendet përbri diçiturave: “Kohëzgjatja e punimeve” dhe ” Garancia e punimeve”, vijojnë të mbeten të bardha (shih foton më poshtë), nga që, sikurse konfirmojnë burime konfidenciale: pas kalimit të afateve, një dorë e padukshme e të interesuarve ka fshirë datat e vendosura më parë duke e lenë të hapur, në pambarimësi kohore, përfundimin e këtij restaurimi, investitor i të cilit është Bashkimi Europian, me 80 179 450.00 lekë.
Investim ky që i ka kaluar afatet e përfundimit dhe, për më tepër, s’dihet kur do të përfundoj. Duke qenë jashtë procesit restaurues, drejtori Koçi, me të drejtë, s’di të thotë më tepër se institucioni që drejton e ushtron veprimtarinë rregullisht, pavarësisht gardhit rrethues e rrjetave të vendosura në ballinë të godinës. E ndërsa është e pamundur të gjendet dora që ka fshirë datën e kohëzgjatjes dhe grancisë së punimeve, mbetet i hapur opsioni i vijimit të restaurimit pa afat kohor dhe mosndëshkimi i subjekteve përgjegjëse. Deri kur?! Dhe për sa kohë do të qendrojë i rrethuar me gardh Muzeu Historik Kombëtar, që mban brenda vetes historinë tonë kombëtare dhe është institucioni më i frekuentuar prej vizitorëve të huaj e vendas? /Koha Juaj
