Ofensiva izraelite në Gaza , e nisur në përgjigje të sulmit të grupit militant palestinez Hamas ndaj komuniteteve në Izraelin jugor më 7 tetor 2023, ka marrë jetën e dhjetëra mijëra palestinezëve dhe ka shkatërrojë pjesë të mëdha të enklavës.

Më poshtë është një përmbledhje nga Reuters e shifrave mbi vdekjet dhe shkatërrimet gjatë luftës në Gaza, ku shumica e këtyre të dhënave janë nxjerrë nga raportet e publikuara nga Zyra e Kombeve të Bashkuara për Koordinimin e Çështjeve Humanitare (OCHA).

Vdekjet palestineze

Që nga 7 tetori 2023, më shumë se 67,000 palestinezë janë vrarë në Gaza, ku pothuajse një e treta e të vdekurve janë nën moshën 18 vjeç, sipas të dhënave nga autoritetet shëndetësore të Gazës.

Ministria e Shëndetësisë e Gazës nuk bën dallim midis civilëve dhe luftëtarëve në numrin e viktimave. Izraeli ka thënë tashmë se të paktën 20,000 nga të vdekurit ishin luftëtarë.

Izraeli pretendon se sulmi i tij synon Hamasin dhe se po përpiqet të shmangë goditjen e civilëve, por se organizata fshihet midis qytetarëve, një pretendim që Hamasi e mohon.

Një hetim i Kombeve të Bashkuara njoftoi muajin e kaluar se kishte arritur në përfundimin se Izraeli kreu gjenocid në Gaza – duke përmendur shembuj që lidhen, ndër të tjera, me shkallën e vdekjeve, për të mbështetur përfundimin e tij. Izraeli e quajti raportin “skandaloz” dhe “të rremë”.

Vdekjet izraelite

Të paktën 1,665 izraelitë dhe shtetas të huaj u vranë si pasojë e luftës nga 7 tetori 2023 deri më 29 shtator 2025, sipas informacionit zyrtar izraelit. Nga këta, 1,200 u vranë në sulmin e 7 tetorit.

Ushtria izraelite thotë se 466 ushtarë të saj janë vrarë në luftime dhe 2,951 të tjerë janë plagosur, që kur filloi operacionin tokësor në Gaza më 27 tetor 2023.

Hamasi rrëmbeu 251 persona dhe i çoi në Gaza si pengje pas sulmit të 7 tetorit. Izraeli thotë se 48 pengje mbeten në Gaza, nga të cilët 20 besohet se janë ende gjallë.

Bazuar në planin që po diskutohet nga të dyja palët për t’i dhënë fund luftës, pengjet e mbetura do të dorëzohen në këmbim të të burgosurve palestinezë që mbahen në Izrael.

Ndërtesa të dëmtuara

Rreth 193,000 ndërtesa në Gaza janë shkatërruar ose dëmtuar, sipas një analize të të dhënave të fundit nga korriku nga Qendra Satelitore e Kombeve të Bashkuara.

Sipas të njëjtit burim, rreth 213 spitale dhe 1,029 shkolla janë shënjestruar. Vetëm 14 nga 36 spitalet e Gazës mbeten pjesërisht funksionale, sipas Organizatës Botërore të Shëndetësisë, dhe ato në Gazën jugore janë të mbipopulluara.

Komisioneri i Lartë i OKB-së për të Drejtat e Njeriut ka shprehur shqetësim serioz për nivelin e shkatërrimit në Qytetin e Gazës, qendrën kryesore urbane të enklavës, dhe ka deklaruar se çdo përpjekje e qëllimshme për të zhvendosur popullsinë do të përbënte spastrim etnik.

Zhvendosja

Sipas Kombeve të Bashkuara, vetëm rreth 18% e Rripit të Gazës aktualisht nuk i nënshtrohet urdhrave të zhvendosjes ose nuk është brenda zonave të militarizuara. Shumë palestinezë janë zhvendosur disa herë.

Që kur Izraeli zgjeroi fushatën e tij ushtarake në Qytetin e Gazës në mesin e gushtit, duke u zotuar të eliminojë militantët e Hamasit, Kombet e Bashkuara kanë regjistruar më shumë se 417,000 zhvendosje njerëzish nga pjesa veriore në atë jugore të enklavës.

Izraeli u ka kërkuar banorëve në Qytetin e Gazës të zhvendosen në jug. Por kushtet në Gazën jugore janë të tmerrshme, me familje të grumbulluara në tenda të improvizuara dhe shërbime të stërngarkuara që përpiqen të përballojnë të sapoardhurit, thonë grupet e ndihmës.

Ushqimi dhe uria

Korniza e Integruar e Sigurisë Ushqimore (IPC) deklaroi në gusht se në Qytetin e Gazës po përhapej një zi buke dhe kishte gjasa të përhapej. Kryeministri izraelit Benjamin Netanyahu e hodhi poshtë raportin si një “gënjeshtër të hapur”. Sipas IPC-së, 514,000 njerëz – gati një e katërta e palestinezëve në Gaza – po përballen me kushte urie.

Të paktën 177 persona – përfshirë 36 fëmijë – kanë vdekur nga uria dhe kequshqyerja që kur u konfirmuan kushtet e urisë në disa pjesë të Gazës, sipas Ministrisë së Shëndetësisë së Gazës.

Më shumë se 60% e grave shtatzëna dhe nënave të reja vuajnë nga kequshqyerja, sipas Fondit të Popullsisë së Kombeve të Bashkuara.

 Lehtësim

Më 21 maj, Izraeli hoqi bllokadën 11-javore ndaj furnizimeve që hynin në Gaza. Organizatat humanitare kanë thënë se ndihma që po vjen në Gaza është shumë e pakët për të përmbushur nevojat.

Shumë organizata humanitare thonë se vazhdojnë të përballen me kufizime dhe pengesa logjistike, përfshirë mbylljen e pikës kufitare Zikim midis Gazës dhe Izraelit më 12 shtator dhe të pikës kufitare Allenby midis Bregut Perëndimor të pushtuar nga Izraeli dhe Jordanisë për furnizime me ndihma ushqimore më 24 shtator.

Izraeli thotë se nuk ka asnjë kufizim sasior për sasinë e ndihmës ushqimore që hyn në Gaza dhe akuzon Hamasin për vjedhjen e ndihmës, akuza që organizata palestineze i mohon.

Rreth 73% e kamionëve me ndihma që transportonin ndihma ushqimore në Gaza në shtator u ndaluan nga civilë të uritur ose me forcë nga bandat e armatosura, sipas OCHA-s.

Që nga 27 maji, të paktën 2,340 njerëz janë vrarë gjatë kërkimit të ushqimit ose furnizimeve të tjera në Gaza – rreth gjysma e tyre pranë pikave të shpërndarjes së militarizuara dhe pjesa tjetër përgjatë rrugëve të konvojeve të ndihmave, sipas të dhënave të OCHA-s deri më 29 shtator.

Fondi Humanitar për Gazën (GHF), i cili filloi shpërndarjen e ushqimit në fund të majit nga një numër i vogël qendrash shpërndarjeje, ka mohuar se incidentet po ndodhin pranë vendeve të tij. Ai vepron jashtë Kombeve të Bashkuara dhe mbështetet nga Izraeli. Ka thënë se deri më 29 shtator kishte shpërndarë më shumë se 175 milionë vakte.