Keir Starmer ka shkarkuar ambasadorin e Britanisë në SHBA, Peter Mandelson , pas zbulimeve rreth miqësisë së tij me Jeffrey Epstein, sipas një deklarate nga Sekretari i Jashtëm Stephen Doughty para deputetëve.
Largimi i Mandelson konsiderohet një goditje e madhe për Downing Street nr. 10, e cila në të njëjtën kohë po përgatitet për vizitën zyrtare të Presidentit të SHBA-së Donald Trump, i cili po përballet gjithashtu me kritika për marrëdhënien e tij me pedofilin vetëvrasës.
Kryeministri britanik e kishte mbështetur Mandelsonin pas emërimit të tij si ambasador në SHBA, duke këmbëngulur se ai ishte verifikuar plotësisht. Por ai u vu nën presion në rritje pas zbulimeve se Mandelson e kishte këshilluar Epsteinin të kërkonte lirim të parakohshëm ndërsa akuzohej për krime seksuale.
Emailet që çuan në shkarkimin nga puna
Emailet, të cilat përmbajnë këto zbulime, u botuan në gazetën Sun vetëm disa orë pasi Mandelson pranoi se mund të dilnin në dritë detaje të tjera “shumë shqetësuese” rreth miqësisë së tij me Epstein. Megjithatë, ai pohoi se nuk kishte qenë kurrë dëshmitar i ndonjë “aktiviteti të paligjshëm”.
Në një email nga qershori i vitit 2008, të cilin zëdhënësi i tij nuk e kundërshtoi, Mandelson i shkroi Epsteinit: “Të respektoj shumë dhe ndihem i dobët dhe i zemëruar për atë që ndodhi.” Ai gjithashtu i tha atij se një gjë e tillë nuk do të ndodhte në Britani. “Duhet të tregosh qëndrueshmëri të madhe, të luftosh për lirimin tënd dhe ta shikosh atë, sa më shumë që të mundesh, filozofikisht. Çdo gjë mund të jetë një mundësi dhe mund të dalësh nga kjo përvojë më i fortë.”
Miqësia e dy burrave doli në dritë pasi anëtarët e Komitetit Mbikëqyrës Demokratik të Dhomës së Përfaqësuesve publikuan “librin e ditëlindjes” të Epstein, i cili përfshinte një shënim të shkruar me dorë në të cilin Mandelson e quante Epstein “mikun e tij më të mirë”./kohajuaj
