Vatikani ka publikuar foto të trupit të Papa Françeskut në arkivolin e tij të thjeshtë prej druri, si pjesë e ritualit për të konfirmuar vdekjen e tij, siç kërkohet nga protokolli.
Siç raporton Vatican News, “gjatë ceremonisë në kapelën e Casa Santa Marta u lexua zyrtarisht shpallja e vdekjes. Akti u ratifikua nga Kardinali Farrell dhe procesi zgjati më pak se një orë.”
Trupi i Papës do të transferohet në Bazilikën e Shën Pjetrit të mërkurën në mëngjes, në orën 9:00 (me orën lokale). Pelegrinazhi popullor është caktuar të zgjasë deri të premten.
Në të njëjtën kohë, Vatikani njoftoi se varrimi i Papa Françeskut do të bëhet të shtunën, më 26 prill, në orën 10 të mëngjesit me orën italiane (11:00 me orën greke).
Pamjet e vulosjes së zyrës dhe banesës së tij po bëjnë xhiron e botës. Qeveria italiane pritet të shpallë 3 ditë zie kombëtare, ndërsa dhjetëra besimtarë po nxitojnë në sheshin e Vatikanit për t’i dhënë lamtumirën e fundit.
Vatikani ka bërë publik testamentin e Papa Françeskut, lidhur me vendin dhe detajet e varrimit të tij. Dokumenti përkatës konfirmon se varrimi i Papës, sipas vullnetit të tij, duhet të bëhet në bazilikën e Santa Maria Maggiore në Romë, e cila i kushtohet Virgjëreshës Mari.
Varri duhet të jetë poshtë dyshemesë, i thjeshtë, pa dekorim të veçantë dhe me vetëm një mbishkrim: Franciscus ”, thuhet në testament.
” Zoti i shpërbleftë ata që më deshën dhe do të vazhdojnë të luten për mua.” “Sprovën e shëndetit tim, që u shfaq në periudhën e fundit të jetës sime, ia ofrova Zotit, për paqen në botë dhe vëllazërinë mes popujve ”, shkruan Françesku në testamentin e tij./kohajuaj.com
