Një erë e pazakontë dhe ndoshta toksike shpërtheu nga anija kozmike ruse Progress 90, e cila mbërriti në Stacionin Ndërkombëtar të Hapësirës (ISS) të shtunën e kaluar. Incidenti alarmoi ekuipazhin dhe shkaktoi një sërë protokollesh sigurie.
Misioni i rifurnizimit Progress 90, i nisur me një raketë Soyuz nga Kazakistani të enjten e kaluar, ka mbërritur me sukses në modulin Poisk të ISS.
Megjithatë, pas hapjes së kapakut, kozmonautët e Roscosmos raportuan një “erë të papritur” dhe vunë re pika të vogla, sipas deklaratës së NASA-s.
Kozmonautët mbyllën kapakun dhe izoluan përkohësisht anijen ruse për të minimizuar çdo rrezik të kontaminimit ose rrjedhjes së substancave të dëmshme.
Mekanizmat dhe sensorët e pastrimit të ajrit të ISS analizuan atmosferën, duke u siguruar që cilësia e ajrit të mbetej brenda niveleve normale.
NASA tha se nuk kishte asnjë shqetësim të menjëhershëm për sigurinë e ekuipazhit.
Deri të dielën pasdite, ekuipazhi punoi për të rivlerësuar situatën dhe për të rihapur kapakun.
Origjina e erës mbetet e panjohur, por anijet kozmike ruse kanë përjetuar rrjedhje në të kaluarën.
Agjencia e lajmeve Russianspaceweb.com e përshkroi erën si “toksike”.
Ekspertët pritet të analizojnë të dhënat për të identifikuar burimin e problemit.
Astronautët shpesh raportojnë erëra të çuditshme në hapësirë, si në ISS ashtu edhe kur kthehen nga shëtitjet në hapësirë
Hapësira, edhe pse e zbrazët nga ajri, përmban molekula që mbajnë erëra.
Disa përshkruhen si tym metalik, të ngjashëm me barutin ose saldim.
Burimi: CNN/ kohajuaj
