Detaje të reja janë zbardhur nga hetimet pas dhunimit të avokatit Sokol Mëngjesi këtë të mërkurë në Tiranë.
Raportohet se kamerat e sigurisë kanë kapur 3 persona, të cilët pas ngjarjes janë larguar me një makinë. Policia falë këtyre pamjeve ka mundur të identifikojë një prej agresorve si dhe mjetin e përdorur. Mësohet se autorët kanë qenë me kapele dhe të veshur me të zeza.
Ndërkohë policia po punon për identifikimin e dy të tjerëve.
Tre persona kanë dhunuar avokatin Sokol Mëngjesi, që njihet dhe si një nga avokatët e ish kryeministrit Sali Berisha në hetim për korrupsion në aferën e privatizimit të ish kompleksit ‘Partizani’. Avokati është dhunuar me levë dhe me sende të forta. Ngjarja u shënua mëngjesin e sotëm, rreth orës 08:50 minuta në zonën e ish bllokut, sapo avokati kishte lënë djalin në kopsht.
