Biznesmeni Ervin Mata, i shpallur në kërkim nga SPAK pas operacionit të mbrëmshëm, jeton në Argjentinë e Bolivi.

Gjatë operacionit që erdhi pas zbërthimit të aplikacionit “SKY” u arrestuan ish-drejtori i Policisë së Tiranës, Erzen Breçani, djali i tij, oficerja e Drejtorisë së Kufirit Jonida Babameto e shefi i Krimeve në Komisariatin 5 Dedan Gjoni,

Sipas gazetares Klodiana Lala, Mata është një person i rëndësishëm për sa i përket trafikut të kokainës nga Amerika e Jugut.

“Ervin Mata është personazhi kryesor i përplasjes në ish-Bllok në vitin 2018 ku u përplas ashpër me Ervis Martinajn. Për këtë ngjarje që në atë kohë u përdor emri i këngëtares, Elvana Gjata, unë e kam bërë të qartë se ishte një përplasje në fushën e narkotrafikut. Përplasja midis dy grupeve kriminale kishte ardhur për shkak të trafikut të drogave të forta.

Ervin Mata konsiderohet një personazh dhe faktor kryesor në trafikun e drogave të forta nga Amerika Latine drejt Bashkimit Evropian. Ai nuk qëndron në Shqipëri pjesën më të madhe të kohës. Këtë verë ka qenë një ose dy herë me periudha të shkurtra dhe mendohet se jeton në Argjentinë, Bolivi etj.” – tha Lala në studion e News24.

Ajo shtoi se një nga personat e arrestuar si pjesë e grupit është edhe një ish-oficer i forcave speciale, i cili dyshohet se ka gisht në zhdukjen e Ervis Martinajt.

Sipas Lalës, Bujar Gërmizi, ka qenë i arrestuar në Maqedoninë e Veriut për trafik droge e po kështu në Kosovë.

Gazetarja shtoi se Gërmizi dyshohej për grabitjen e Bankës së Kursimeve shumë vite më parë ku mendohet se janë marrë rreth 300-400 milionë lekë.

“Unë e kam njohur disa vite përpara dhe për herë të parë e kam hasur me dokumente zyrtare në 2014. Ai dyshohet se ka lidhje edhe me zhdukjen e Ervis Martinit. Bujar Gërmizi, është ish-oficer i forcave speciale, ish-gardist, shoqërues i disa personaliteteve, ministrave dhe ish-ministrave. Ishte arrestuar nga autoritetet e Maqedonisë së Veriut për çështje të trafikut të drogës, u arratis në mënyrë spektakolare nga burgu.

Pati një përpjekje titanike atje për ta arrestuar. Ai hyri në Shqipëri dhe kërkoi që dosja të sillej këtu. Autoritetet maqedonase nuk pranuan dhe kërkuan të arrestohej dhe më pas të sillej dosja. Duke qenë se ishte në veri të vendit, duket se nuk tërhoqi vëmendjen. Për shkak të punës në Gardën e Republikës dyshohej për grabitjen e Bankës së Kursimeve në shuma të konsiderueshme prej 300 apo 400 milionë lekë.

U arrestua dhe u dërgua në burg në Prizren, pati revolta të forta. Kohët e fundit mendohet se ishte lidhur me disa grupe kriminale. Është i futur thellë në trafikun e drogës dhe këtu bëhet lidhja me Ervin Matën. Është duke u hetuar edhe në lidhje me zhdukjen e Ervis Martinajt”, tha Lala.