Një grua 78-vjeçare, e dënuar më parë për dy grabitje bankash, përballet me akuza të reja pasi dyshohet se ka kryer një grabitje në Missouri, gjatë së cilës i ka dorëzuar një arkëtari një shënim ku shkruante “Nuk doja të të trembja”.
Bonnie Gooch është burgosur pasi u akuzua për vjedhje të një institucioni financiar të mërkurën e kaluar, raportoi Kansas City Star.
Gooch u dënua për grabitjen e një banke në Kaliforni në vitin 1977 dhe një në periferi të Kansas City në vitin 2020. Dënimi me kusht për grabitjen e dytë përfundoi në nëntor 2021.
Dokumentet e gjykatës thanë se në shënimin e grabitjes së fundit shkruhej se ajo donte “13,000 dollarë” dhe shtoi: “Faleminderit! Më falni, nuk doja t’ju trembja”.
Gruaja dyshohet se i tha personit në sportel që të mos i numëronte paratë dhe t’ia jepte asaj. Në kamera, ajo duket duke goditur banakun dhe duke i kërkuar arkëtarit të nxitonte.
Dëshmitarët thanë se e dyshuara ishte e veshur e gjitha me gri, kishte doreza plastike, një maskë të zezë dhe syze dielli të zeza.
Prokurorët thanë se ajo mbante erë alkooli kur u gjet dhe paratë ishin shpërndarë në makinë. “Është vetëm e trishtueshme,” tha shefi i policisë i cili shtoi se e dyshuara nuk kishte sëmundje të diagnostikuara.
