Në Konferencën e Donatorëve, që u mbajt në Bruksel Shqipëria akordoi 1 milion euro për të mbështetur rindërtimin e zonave të prekura nga tërmeti shkatërrimtar në Turqi dhe Siri.
Zëvëndës kryeministrja dhe njëherësh ministrja e Infrastrukturës dhe Energjisë në Shqipëri, Belinda Balluku ishte e pranishme në Konferencën e Donatorëve të zhvilluar nga Komisioni Europian dhe nga Presidenca Suedeze.
Në një videomesazh pas konferencës, Balluku u shpreh se “populli ynë e ka provuar gjatë 2019-ës se sa e rëndësishëm ishte solidariteti i treguar nga të gjitha shtetet sidomos nga shteti turk, që nisi menjëherë skuadrat e shpëtimit”, raporton ATSh.
“Ashtu kemi bërë edhe ne, që në momentin e parë duke dërguar një nga skuadrat tona më të përgatitura për shpëtim dhe njëherazi dhe një skuadër me mjekë dhe infermierë”, tha ajo.“Por sot në Konferencën e Donatorëve ne shprehim gatishmërinë për të mbështetur me një fond prej 1 milion euro rindërtimin në zonat e rrënuara nga tërmeti në Turqi dhe Siri. Është një shumë modeste por ne sot tregojmë solidaritet por edhe respektin tonë për popullin vëlla turk dhe sigurisht për bashkëpunim midis dy qeverive duke nisur nga niveli i bashkëpunimit ekonomik dhe diplomatik dhe për t’iu gjendur pranë në këto ditë të vështira si këto”, u shpreh Balluku.
Ndërsa, ministri i Financave për Kosovë, Hekuran Murati është ankuar për trajtim diskriminues nga BE-ja në konferencë të donatorëve.
Murati, ka thënë se ai nuk ka qenë në gjendje ta përfaqësojë Kosovën në konferencën e donatorëve të organizuar nga BE-ja në Bruksel për të mledhur fonde për Turqinë e Sirinë. Murati tha se organziatori kishte kërkuar që Kosova të paraqitej me fusnotë.
Murati ka thënë se kjo ka pamundësuar pjesëmarrjen e Kosovës. Konferenca e donatorëve është mbajtur për të mbledhur fonde për të ndihmuar qytetarët në Turqi e Siri që u goditën nga tërmetet shkatërruese.
Murati në Tëitter, ka thënë se Kosova donte të kontribuonte, por iu pamundësua pasi “çasja e organizatorit ishte shumë jokorrekte”.
“U desh t’i ndërroja tre aeroplanë për të arritur sot në Bruksel për të marrë pjesë në konferencën e donatorëve në mbështetje të njerëzve në Turqi dhe Siri të prekur nga tërmetetet shkatërruese. Qeveria e Kosovës dëshiron të zotohet për mbështetje financiare dhe të jetë pjesë e gjithë përpjekjeve ndërkombëtare për të ndihmuar. Fatkeqësisht, vendim in nuk mundi të merrte pjesë dhe të kontribuonte për shkak të trajtimit jokorrekt dhe diskirminues nga organizatori, që insistoi në përdorimin e fusnotës në kundërshtim me marrëveshjen fillestare të Brukselit dhe frymën e konferencës së sotme”, ka shkruar dje Murati në Twitter.
